Fyrir helgi hélt Ásta Dís Óladóttir, prófessor við Háskóla Íslands, erindi á Bleika deginum hjá Arion banka, þar sem hún kynnti starfsemi Rannsóknaseturs um jafnrétti í efnahags- og atvinnulífi.
Í erindinu fjallaði hún um stöðu kynjanna í atvinnulífinu og kynnti niðurstöður nýrrar könnunar sem sýnir að karlar og konur upplifa stöðuna á gjörólíkan hátt.
Karlar og konur upplifa stöðuna á gjörólíkan hátt
Samkvæmt könnuninni telja aðeins 48% þátttakenda að karlar og konur hafi jöfn tækifæri til að hljóta stöður í efsta lagi stjórnunar.
59% karla eru sammála þeirri fullyrðingu, en aðeins 36% kvenna.
Þegar spurt var hvort of hægt gengi að jafna kynjahlutföllin sögðust 73% kvenna sammála því,
en aðeins 41% karla.
Þessi viðhorf sýna að upplifun kynjanna á jafnrétti er ólík – og að tilfinningin um að jafnrétti hafi náðst stenst ekki samanburð við raunveruleikann.
Raunveruleg staða í atvinnulífinu
Tölur sýna að karlar eru enn í miklum meirihluta í æðstu stöðum atvinnulífsins:
📉 Karlar eru 81% framkvæmdastjóra og forstjóra
📈 85% forstjóra skráðra félaga á Nasdaq Iceland eru karlar
📊 73% stjórnarmanna hér á landi eru karlar
💼 Konur eru innan við 30% fjárfesta og stofnenda nýrra fyrirtækja
„Þrátt fyrir tilfinninguna að konur stjórni öllu sýna gögnin að það er enn langt í raunverulegt jafnrétti í efnahags- og atvinnulífi hér á landi,“ segir Ásta Dís.
„Við verðum að byggja umræðuna á staðreyndum – ekki tilfinningum. Jafnrétti í atvinnulífi er ekki aðeins réttlætismál – það skapar sterkari fyrirtæki og betra samfélag.“